धुन्चे गाउँ बाल संरक्षण तथा संबद्र्धन समिति गठन

धुन्चे, रसुवा, भदौ ९ गते ।धुन्चे गाविसमा रहेका बालबालिकाको संरक्षण, संबद्र्धन तथा सर्वाङ्गीण विकासका लागि गाउँ स्तरीय बाल संरक्षण तथा संवद्र्धन समिति गठन गरिएको छ । 

जिल्ला बाल कल्याण समितिको सहयोगमा निर्देशिका अनुसार गाविसका प्रतिनिधि, महिला स्वास्थ्य स्वयं सेविका, महिला कार्याकर्ता, राजनीतिक दलका प्रतिनिधि, बाल अधिकारकर्मी, नागरिक समाजका प्रतिनिधि, बाल क्लबका प्रतिनिधि तथा आदिवासी जनजातिको प्रतिनिधि सम्मिलित ९ सदस्यीय समिति गठन गरिएको धुन्चे गाविसका सचिव टिकमबहादुर शाहीले जानकारी दिनुभयो ।

समिति गठन कार्यक्रममा जिल्ला बाल कल्याण समितिका बाल विकास अधिकृत भगवती पौडेल र महिला विकास अधिकृत सन्ध्याराज सिंहले बाल अधिकार, नीति नियम तथा अन्तरराष्ट्रिय सन्धी, महासन्धीका विषयमा अभिमुखीकरण गर्नुभएको थियो ।